دو لاکھ روپے تک بینک میں جمع کرانے پر کوئی ٹیکس کٹوتی نہیں ہوگی، ایف بی آر

اسلام آباد: ایف بی آر نے آل پاکستان تنظیم تاجران کو یقین دہانی کرائی ہے کہ 2 لاکھ روپے تک نقد بینک میں جمع کرانے پر ٹیکس نہیں کاٹا جائے گا۔

تاجروں کے وفد کے ساتھ مذاکرات میں ایف بی آر حکام نے واضح کیا کہ ڈیجیٹل انوائسنگ کا اطلاق چھوٹے تاجروں یا ریٹیلرز پر نہیں ہوگا، یہ صرف سیلز ٹیکس رجسٹرڈ B2B کمپنیوں پر مرحلہ وار لاگو ہوگی۔

سیلز ٹیکس قوانین 37A اور 37B بھی چھوٹے تاجروں پر لاگو نہیں ہوں گے، ان کا مقصد صرف جعلی انوائسز کی روک تھام ہے۔

کسی صنعتکار کو گرفتار نہیں کیا جائے گا۔ ڈیجیٹلائزیشن کمیٹی میں تاجر نمائندے شامل کیے جائیں گے۔ مارکیٹوں میں چھاپوں سے متعلق نیا طریقہ کار طے کرنے کے لیے الگ اجلاس ہوگا۔ موبائل فونز پر ٹیکس اصلاحات میں بھی تاجروں سے مشاورت کی جائے گی۔

اجلاس میں کاشف چوہدری، سلمان صدیقی، شرجیل میر سمیت دیگر تاجر رہنماؤں نے شرکت کی اور واضح مؤقف اپنایا کہ ظالمانہ ٹیکسز کسی صورت قبول نہیں۔